Leviticus 15

Ubovu obudala ukungcola

1UJehova wathi kuMosi lo-Aroni,

2“Khulumani labako-Israyeli lithi kubo: ‘Nxa indoda ilengulamakhwa, ubovu obuphumayo bungcolile. 3Lanxa buthonta emzimbeni wakhe loba buvalekile, bumenza abe ngongcolileyo. Lokhu yikho okwenza ubovu obuphuma emzimbeni wakhe bumenze abe ngongcolileyo:

4“ ‘Loba yiwuphi umbheda indoda le ephuma ubovu ezalala kuwo uzakuba ngongcolileyo, njalo loba kuyini ezahlala phezu kwakho kuzakuba ngokungcolileyo. 5Loba ngubani othinta umbheda wakhe kufanele agezise izigqoko zakhe abesegeza ngamanzi, uzakuba ngongcolileyo kuze kube kusihlwa.

6Loba ngubani ozahlala loba kuphezu kwani lapha okuke kwahlala khona indoda ethonta ubovu kufanele agezise izigqoko zakhe abesegeza ngamanzi, uzakuba ngongcolileyo kuze kube kusihlwa.

7“ ‘Loba ngubani ozathinta lindoda kufanele agezise izigqoko zakhe abesegeza ngamanzi, ngalokho uzakuba ngongcolileyo kuze kube kusihlwa.

8“ ‘Nxa indoda elengulamakhwa ingakhafulela omunye ongelayo, lowo muntu kagezise izigqoko zakhe abesegeza ngamanzi, yena uzakuba ngongcolileyo kuze kube kusihlwa.

9“ ‘Konke indoda le ehlala kukho igadile kuzakuba ngokungcolileyo, 10njalo loba ngubani ozathinta loba yini yezinto ebezingaphansi kwakhe uzakuba ngongcolileyo kuzekube kusihlwa, loba ngubani ozadobha lezo zinto kufanele agezise izigqoko zakhe abesegeza ngamanzi, njalo uzabe engongcolileyo kuze kube kusihlwa.

11“ ‘Loba ngubani ozathintwa yilindoda elengulamakhwa engagezanga izandla zakhe ngamanzi kufanele agezise izigqoko zakhe abesegeza ngamanzi, kodwa uzakuba ngongcolileyo kuze kube kusihlwa.

12“ ‘Imbiza yomdaka ezathintwa yile indoda kufanele ibulawe, kuthi konke okwenziwe ngesigodo kumele kuhlanjululwe ngamanzi.

13“ ‘Nxa indoda isihlanjululwe ekuthonteni kwayo ubovu, kayibale izinsuku eziyisikhombisa kube yikuhlanjululwa kwayo ngokomkhuba; ifanele igezise izigqoko zayo ibisigeza ngamanzi amahle anduba ihlambuluke. 14Ngosuku lweficamibili kufanele ithathe amajuba amabili loba abantwana benkwilimba ababili ize phambi kuka Jehova esangweni leThente lokuHlanganela iwaqhubele umphristi. 15Umphristi uzanikela ngakho; okunye ngokomnikelo wesono, okunye kungumnikelo wokutshiswa. Ngalokho uzakwenza ukubuyisana phambi kuka Jehova kwaleyondoda ngenxa yomkhuhlane wayo.

16“ ‘Nxa indoda ivuza ubudoda kumele igeze umzimba wayo wonke ngamanzi, njalo izakuba ngengcolileyo kuze kube kusihlwa. 17Loba yisiphi isigqoko kumbe isikhumba esilobudoda kufanele sigeziswe ngamanzi, njalo kuzakuba ngokungcolileyo kuze kube kusihlwa. 18Nxa indoda ingalala lowesifazana ichithe, bafanele ukuthi bobabili bageze ngamanzi, ngakho bazakuba ngabangcolileyo kuze kube kusihlwa.

19“ ‘Nxa owesifazana esemfuleni njengenjayelo, ukungcola kwakhe okubangelwa yikuba semfuleni kwakhe kuzathatha izinsuku eziyisikhombisa, ngakho wonke omthintayo uzakuba ngongcolileyo kuze kube kusihlwa.

20“ ‘Yonke into owesifazana lo azalala phezu kwayo ngesikhathi esemfuleni izakuba ngengco-lileyo, njalo loba kuyini azahlala phezu kwakho sekungcolile. 21Ozathinta umbheda wakhe kufanele agezise izigqoko zakhe abesegeza umzimba ngamanzi, njalo uzakuba ngongcolileyo kuze kube kusihlwa. 22Loba ngubani ozathinta loba kuyini owesifazana lo abehlezi phezu kwakho kufanele agezise izigqoko zakhe njalo ageze umzimba ngamanzi, njalo uzakuba ngongcolileyo kuze kube kusihlwa. 23Akukhathalekile ukuba kungaba ngumbheda loba enye into nje lo owesifazana abehlezi kukho, umuntu loba engubani angakuthinta, uzakuba ngongcolileyo kuze kube kusihlwa.

24“ ‘Nxa indoda ingalala lowesifazana osemfuleni ibe isithinta igazi lomopho wakhe, indoda izakuba ngengcolileyo okwezinsuku eziyisikhombisa, loba yiwuphi umbheda ezalala kuwo uzakuba ngongcolileyo.

25“ ‘Nxa owesifazana angopha okwezinsuku zilandelana engekho emfuleni loba esopha okwensuku ezedlula izinsuku zokopha nxa esemfuleni, uzakuba ngongcolileyo nxa ukopha kungakemi, njengasezinsukwini zakhe esemfuleni. 26Loba yiwuphi umbheda azalala kuwo nxa umopho uqhubeka uzakuba ngongcolileyo, njengokungcola kombheda wakhe ngesikhathi esemfuleni, njalo konke ahlala phezu kwakho kuzakuba ngokungcolileyo, njengokungcola kwakhe nxa esemfuleni. 27Loba ngubani ozathinta lezizinto uzakuba ngongcolileyo; kufanele agezise izigqoko zakhe abesegeza ngamanzi, ngalokho uzakuba engongcolileyo kuze kube kusihlwa.

28“ ‘Nxa esehlanzekile ekopheni kwakhe, kufanele ahlale izinsuku eziyisikhombisa anduba ahlambuluke ngokomkhuba. 29Ngosuku lobuficambili uzathatha amajuba amabili loba abantwana benkwilimba ababili akulethe kumphristi esangweni leThente lokuHlanganela.

30Umphristi uzanikela okunye kube ngumnikelo wesono kuthi okunye kube ngumnikelo wokutshiswa. Ngale indlela uzakwenza ukubuyisana kwakhe phambi kukaJehova ngenxa yokungcola kwakhe esopha.

31“ ‘Kufanele wahlukanise abako-Israyeli ezintweni ezibangcolisayo, ukuze bangafeli ekungcoleni kwabo bangcolise indawo engihlala kuyo, ephakathi kwabo.’ ”

32Le yiyo imithetho eqondene lendoda elengulamakhwa, loba ngubani ongcoliswe yikuphuma ubudoda,

33lowesifazana nxa esemfuleni, lendoda loba owesifazane okuphuma kuye okungcolileyo, njalo lendoda elala lowesifazane ongcolileyo ngokomkhuba.